Tuesday, April 17, 2012
METODE PER LEXIMIN E HIRIT
PIRRO LOLI
METODE PER LEXIMIN E HIRIT
POEZIA NE VETEN E PARE
Jam re e bardhë
Që më shtyn era
Rrëshqas para pasqyrës
Për pozën e çastit
Dhe ndryshoj sërish
Në sallonin e modës.
Në asnjë pasqyrë nuk më duken
kapilarët e gjakut As pesha e diellit të shkrirë
mbi shpinë.
Ëndërrat prej shiu
ma përmbytin shpirtin.
Qarkoj në vetvete dhe nuk ia tregoj as pasqyrës
sisët që më varen në qiell
Për të ushqyer buzët
e gurit
me qumësht.
PERVOJE VETVRASJEJE
QE PERFUNDON ME KITARE
Diçka i mungon tablosë sime
Ndoshta era tek një qime floku
Një zog përtej kornizës
Apo një ulërimë qeni në periferi të qytetit
E grisa, e shpova me gozhdë
E çava me thikë
E pështyva telajon dhe pasqyrën.
Kokën e fsheha në barkun e kitarës.
S’ka lindur akoma djalli që ta kurorëzoj vetveten.
Në këtë përleshje ngjyrash.
Të mposhtin mungesat
Pres
Të më trokasë djalli në xhamin e dritares
Ta nis përsëri kryqëzatën
Të hyjë era dhe zogu
Dhe ulërima e qenit
Ta përplas pas murit kitarën.
VARRI I ZOGUT
Ai e ka zemrën te krahët
orë e çast
ndërton skelete të reja fluturimi
dhe nuk i dihet as gjethja e gjumit
As pllaka e varrit
kish një brengë
Që ia dogji gushën
E diku mbeti si tingull Si një pikë diell
Që shuhet e shuhet e shuhet
Shpirt i pushtë me pupla mëndafshi
Më kot ta kërkova varrin në tokë
S’t’i gjeta dot ato pesë kocka të holla pentagrami
hapur si partiturë cicërimash
në ajër
DETI GENJESHTAR
Më kishe premtuar një sirenë zëëmbël,
Të ma nxirrje në breg lakuriq
vetëm zërin i doja
Le të ishte sirena e vdekjes
Por, ti, më dole i pabesë, o det...
Gjuha jote gënjeshtrambushur, dallgët e tua njera pas tjetrës
Zhurmojnë tërhiqen turfullojnë e shpërbëhen në shkumë.
Vetëm sirenën zëëmbël doja
Nuk të kërkova
As yje të argjentë, as rubinë e thesare
Ti,
Nga buzët e ujta pështyn leshterikë të zinj
Alga të kalbura e gëlbaza të kripura
Prej honesh të thellë
O det, o det!
nëse nuk ma sjell sirenën
Pingul do hidhem mbi ty,
prej gryke do të të kap të të mbyt..
PËRROI I KRIMBIT
(brezit tim)
Do ta marr zemrën tënde,
Ta hedh si ftua të kalbur në një shportë vjeshte !
Keqas është plagosur që foshnje
në një lulekrimbi
që në syth.
S’e kapërceve dot përroin e krimbit
Ai krimb i dhjamur pa sy pa veshë
Si ushtar prej plumbi
lirshëm të lëviz Nga veshka në barkushë.
Rrëkera me gjak të ndryshkur qarkullojnë në zemër
Në mish të vetvetes Më kot jep e merr
thika e kirurgut.
Përroi i krimbit s’kapërcehet me hap.
ABORT
Poeti është një grua që aborton
Mos më pyesni për seksin As Për ato copa diejsh
këputur nga mitra e poetit Që shprishen e shprishen
sa mezi dallohen dy sy me gjak të pabërë
dhe dy buzë plastike.
Me barkëzën time prej letre
Lundroj në një det mëkatarësh
Besoj vetëm këtë kryq në qafën time
Këtë kryq. Si zemrën e një foshnjeje
Që më thërret të mbytem.
Të mbytem Në krahët e një batice
Ku
Me njëqint stile spektakulare
Puthen dy delfinë të dashuruar.
...
SYRI ME MBETI NGA DETI...
Nuk ka ishulli im
as ngrica as furtuna të nënujshme
Të ma këputin spirancën.
Më shtrëngon në fyt Ky zinxhir metalik,
i përjetshëm E monoton.
Sytë më mbetën nga deti Enden
nga një barkë në tjetrën
Fshehtas hodha dorashkat dhe këpucët në dallgë
Dhe buzët i nisa në në një sqep pulbardhe
Mu kthyen duart prej uji
Këmbët e saj si barka të përmbytura
Dhe këmishën nuk di ku e shpuri shkuma.
Në dhëmbët e dyshimit
Pezull valavitem
Në spirancën e florinjtë
Atëhere, shkula zemrën E hodha në det
dhe u mbyta.
KEQKUPTIMI I CASTIT, RRËNJËT
E vetme është kupa e qiellit mbi tokë
Dhe nën këmbët e mia
Një pikë qielli është dhe kjo pemë
Ku kam hipur. Gjethet dhe dhe zogjtë
Që më rrethojnë
Keqkuptimi i çastit janë rrënjët
Vjen një erë e lehtë
E pema kë - ngë - zon,
Drithërohet dega
dhe gjethja bëhen zog...
dhe unë Para se të bëhem krejt i kaltër
Dy tre cicërima do lë në sqepin e erës
Që ti lehtësisht të ma gjësh portën
Në ajër.
PULSI I DHIMBJES
Të përpikta lëkurët e njeriut në garderobë
Nga e para deri tek e shtata Të trasha e të rrëshqitshme
Të papërshkueshme
nga shigjetat, ngjarjet, situatat.
Unë e çvesha në heshtje lëkurën time
E vara në pemë ta hanë mizat.
Dhe mbeta mish i freskët
Me dhimbjen lakuriq.
E prushtë dhimbja
Shkumëzon në mua
Dhe e djeg palcën e gurit.
Tani mund t’i falem copës sime të bukës
Si dhimbjes Dhe ju
mund të ma mbërtheni kyqin e Krishtit
mbi shpatulla ta mbaj
Peshën që më takon .
GURET E URREJTJES
E shtërngova në grusht gurin tim
Deri në përgjakje
Që guri të mos përplaset me gurë
Le të flerë urrejtja në vezën e gurit
Dhe nëse e çel e nxehta e korrikut,
Si zog ogurzi
do ta lë të vdesë.
Shtrirë të mbeten krahët e mi
Deri te kufiri i gurit dhe i gjarprit
Të më rrjedhë gjaku nëpër gishta
T’i mbulojë bari
gurët klimaterikë Dhe distancat.
JASHTË VARREZËS
Të vrarët e kampeve kundërshtare
U rreshtuan me të mundurit
Nga të dyja anët.
Ata nuk ankohen për plagët e dhimbjet
Përqafuar rrinë, kafkëshpuar
Me njeritjetrin
në paqe.
Krimbat e lavdisë
Krimbojnë mbi plagët imagjinare
Si krimbat e nëntokës…
Pa sy
Pa veshë
Jashtë varrezës
Sqepojnë në mish.
KAPROLL GUSHËBARDHË
E arta rreze dielli
Ra si tingull mbi ballin e kaprollit
Dhe e zgjoi
Brofi me një flutur në sy
E turbulluar Pllajës së bredhave
vrulltas u hodh Nëpër mjegull.
Në shtegun e bardhw
Ballëpërballë me mua gjahtarin
Buzëqesh gushëbardhi i habitur
M’u drodh qerpiku i syrit
Dhe shtanga
Me njëmijë diej në bri
Mua më vrau kaprolli
TRADHETIA SI VARIANT
Alternativa e fundit tradhëtia. Si vdekja
Që nuk të gënjen.
Në fillim tradhëtojnë sendet
Dhe kur i ke në dorë. Lagrohen pak nga pak
Nipat dhe djemtë. Dhe dashuria për atdheun
Bëhet vdekjeprurse. Mish i këputur.
Torturë e shkurtër. Tradhëtia
Mbushur me ankthe duelesh të humbur.
Dikush në breg hingëllin egër e shkumëzon
I gatshëm t’i kryqëzojë shpatat
Por unë, si kalorës mesjetar, shtërngoj frerin
largohem fisnikërisht
T’i ruaj distancat.
KUNUPI
Bashkë me ajrin e kulluar Në dhomën time
hyn dhe një kunup Që e tërheq drita e vonuar
Tërë natë vjen vërdallë,
imcak
Që s’ta sheh syri
Tinëzisht
Ma ngul thumbin në mishrat e përgjumura
I bezdisur zgjohem,
e shoh triumfatorin
Në mur.
E shtyp me çka më ndodhet në duar e
Mbetet njolla e vockël e pistë
Si vulë
Shkruar me zorrë milimetrike kunupi
Ku shquhet qartë vetëm
Pika e gjakut që kishte thithur nga unë.
ELEGJI PER PEMET
Njerëz të përsosur.
Vuajnë burgimin e përjetshëm. Në heshtje. Rrënjët
Si pranga në kyçet e këmbës. Deri në palcë duruar.
Varreve të thellë ku humbet zëri.
Ua dëgjoj pulsin e dhimbjes
Gjakun në vena dhe frymëmarrjen
Mua , e dashur
më tmerron ajo klithma e tyre e heshtur
Dhe paralajmëroj
të ardhmen tragjike të pemëve
Panjat dhe bredhat ende të pakorruptuar
Nuk dinë tw mbrohen
As të shajnë as të intrigojnë Pemët
Por ti, mundohu t’i ikësh fatit
Mbetmu panjë e bardhë
Dhe unë si bredh
Të të qëndroj rreth shtratit.
EMBRIONI
I porsaardhuri është i huaj Si bebe e syrit embioni
Pak nga pak rritet në mua Si përbindësh i verbër
Së pari sheh e prek atë Që do të mohojë
Tradhëtar i dashur është
Si Juda
do të më shesë me të puthur
...
Mbi poezitë e vrara shkruhen poezi të reja
Vazhdon shkatërrimi i botës….
Po muzgu i habisë sime
Nguron për të ikur.
SHALLI I YLBERTE
Historinë e Nojës e përpiu harresa
Nuk do të ketë më përmbytje totale
Në të dyzetën ditë
Shkrepi dielli dhe si firmë surrealiste
Midis dy brigjesh U var shalli i ylbertë.
Shtatë ngjyra lagin shirat
Shtatë duar krehin flokët e tua
Shtatë lule plagësh djegin trëndafilat.
Kjo foshnjë në barkun tënd
Garant për të gjitha nënat
Do të jetë i bukur
si Krishti
Në gushën e bardhë
Akoma pa lindur
ka shallin e ylbertë.
RËNIE
Parashutë lidhur me njëqint fije
Krahëhapur lëkundem majtas e djathtas
Zemërngrirë në ankthe sekondash
Vetëm në
R
Ë
N
I
E
ekzistoj
Tek zbres për t’i njohur të gjitha
Qorrsokaket, korridoret, humnerat
Dhe varret.
TEATER ABSURD
Salla e parlamentit plot e përplot me të gjallë e të vdekur
Aktorë e spektatorë, pa mish në faqe
me skelete kockash Të etur për role historikë
Kocka të holla gishtash
Brinjë të thyera në traun e ekuilibrit
Vertebra të shtrëmbëruara “strategjike”.
Teatër absurd. Në kërkim
të një regjisori. E lashë skeletin tim.
të copëzuar jashtë porte E në duart prej mishi
Mbajta vetëm kockën e rrumbullaktë të ballit
Për mirëkuptim.
HARRESA
Ky lumë nuk e arrin kurrë detin
Mbyturazi mërmërin Në kafka kujtese
mbi heshtjen Dhe asgjënë.
Jo të vdekurit por të gjallët
E pijnë lumin e Lethes*me dëshirë
dhe ujët e mallkuar ua errëson damarët.
Gjarpërinj të hirtë
ëndërrojnë këmisha të harruara stërgyshësh.
klithin hardhuca prejhistorike
Dhe dinosoarë modernë.
Gëzhoja të shuara. Nën rërë.
Heshtin fosilet e krimit
ngjarjet dhe sendet.
*Lumi i harresës.Sipas legjendës,më i madhi lumë i skëterrës.
FRIGORIFER
Kanë zënë brymë
Të gjithë demonët e dashurisë në frigoriferin tim
Dhe buzët dhe puthjet. Të detyruar jemi
Orë e çast t’i falemi tiranisë së dimrit që
Me mirkuptim po na i merr të gjitha stinët.
Bula djerse çelin limonatat e ftohta
Dhe mollët. Me akull është mbuluar mishi
Në katin e sipërm.Vdiq nga torturat
Pjeshka me pushin në faqe.Plasi një shishe birre
E harruar.
Zgjatemi nëpër katet e borës Sadopak
Dimrin ta zbutim
Me frymën e duarve tona.
DJALLI DHE POETI
Thika që rrotullohen
Në teh të njera tjetrës
Demon që çel nga lulet
Apo lule që çel nga demoni
Ai i hoqi maskat
E dashura ime
Diku përtej bregut më kot më lutet
Ta ndajmë së bashku vdekjen
TRE LITARE MA SHTERNGOJNE FYTIN
Erdhi flutura e
Fap e fup me peshqir të bardhë
fikte dritat në lulet e qirshisë
Pastaj u harrua në një puthje
Tek vathët e varura gushës së jargavanit
Qirshia u deh e u shkri si diell
nga rrënja në gjeth. Si zile
Tringëllinë vathët e jargavanit
Trekëndësh varur në qiell
Tre litarë ma shtërngojnë fytin
Flutur, qirshi, jargavan.
DERRAT E ODISESE
Odiseja me ndihmën e Hermesit
Përsëri i ktheu derrat në njerëz
Por,
Nuk e mendoi pengesën e re :
Rrebelimi i erdhi nga derrat :
“Nuk e duam fytyrën e njeriut - i thanë
Ishim më mirë derra të zhytur në llucë
Pa asnjë ide për vdekjen dhe perënditë
Pa ankthin e tmerrshëm të kthimit.
Na i kthe lëkurën e trashë
Qimet në trup dhe katër këmbët…
Na i kthe bishtin e vogël për të trembur mizat
Dhe dhëmbët e dalë në nofull, imzot
Pse s’na le të hamë bar dhe rrënjë shkurresh
Urithë të ngordhur dhe zhardhokë në govatë
Imzot, ne nuk e duam kthimin në Itakë..”
E VERTETA
Ma çau syrin e vërteta
U ul tek unë si në shtëpine e vet
këmbëkryq në retinë.
Më kot e ushqeva me çokollata
M’u mpak e m’u hollua si fije peri
Deri në mosnjohje. E vërteta.
Një lumë i tërë mbledhur në bebe të syrit
Që nuk del dot nga vrima e gjilpërës…
Hetuesit hetojnë aktin e fundit:
Kur ajo mblodhi krahët
Qëndroi në zgrip të qerpikut
Dhe vertikalisht u hodh në humnerë…
NJË VIZITË NË ARDHMËRI
I tepërt u ndieva
atje ku humbet kufiri dhe lumi
atje ku vdekja trokon me potkoj të florinjtë.
Më kot i paskam dashur lulet dhe zogjtë
(nuk e paskam hapur dot një dritare në pemë)
Atje më mungonin të gjithë të njohurit :
“Nderet e Kombit”, putanat, shkencëtarët e poetët.
Hije kishte.Vetëm hije
thonjtë u ishin rritur pas vdekjes
dhe ca qime të hirta në mjekër.
Mora xhaketën dhe u ktheva
Nuk e pashë dot fytyrën e ringjalljes sime.
MEDALIONI I NERONIT
Në tregun e arit Shiten dhe medalonët e Neronit
derdhur në varse për çelsa
Dhe çakmakë për të ndezur cigaren Dhe kryqe Krishti
për t’i varur në gushë Dhe orë me akrepa
si thika të holla gijotinash.
Tw florinjta, tw argjenta
Lodrojnë mbi kafkën e Neronëve modernë.
Dhe zogu im ka një unazë hekuri
Me inicialet e Neronit në këmbë.
Vjeshta m’i hëngri gjethet e hardhisë
Dhe unë, zogu këmbëlidhur, sqepoj kokrrat e rrushit
Si saçmat e derrit të egër më mbeten në grykë…
KERKESE PER VETVRASJE
Qysh herët zbriti drakulla nga përrallat
Ku mbante ndër dhëmbë rrënjët dhe burimet
Dhe e sigurtë u strehua në një shpellë të mishtë
brenda njeriut.
Dhe nuk ka asnjë kërkesë, fjala vjen
Që ta shqyejë trurin dredharak dhe zemrën e zezë
U mësua me organet e brendshme si me vetveten
Dhe nuk e sulmon as tigri as luani as gjarpri atë shpellë.
Ia njohin kurthet e fshehta sytë e zjarrtë
dhe dhëmbët prej drakulle.
Herë pas here vetëm poetët dhe artistwt
varin nekrologjitë e tyre në shtyllë
Pa dhënë spjegime pse varën veten.
KUJTIMET
I vrava të tëra kujtimet
Që nga palca e kockës
Gjer në rrëmb të syrit Milingonat
M’u duk se shpëtova nga hijet
Por fillova të vdisja dalngadalë. Gjaku m’u ftoh
I mbytur po zhytesha në një lumë të thellë
E asnjë fije kashte nuk gjeta dot
Të kapja dorën. Në çastin e fundit
Thirra përsëri milingonat e dashura
Që kishin shpëtuar nën lëkurë
Hamëni - u thashë - pickomani trupin
Që përsëri të ndjehem
I gjallë.
SHPELLAN NË SHPELLINË
E frikshme
Kjo shpellë ku digjen lulkuqet
e pikturoj zogj të ngrirë
zogj historikw
Sqepkyçur nga e pathëna.
Kuq e zi
Një e kuqe e nxehtë
mbi të zezën valë.
I rëndë ky mallkim kuqezi mbi mua
Shpellan në shpellinë
Rrethuar nga hije
e statuja.
TË VDEKURIT
Kat mbi kat gjënden të vdekurit e mi
Veç jo në tokë. I takoj kur hipin
Pallatit të bardhë
Me një ashensor të tejdukshëm
Që ishte nisur në parajsë. Më kapin prej krahu.
Më flasin. Më urdhërojnë. E zbrezin me qejf
Deri te vdekja.
Ata që mungojnë janë tanët
S’ka të tjerë
veç atyre që humbasim.
REPORTAZH PËR CA KUJTIME DASHURIE
DHE NJË PLEP
Ky plep bardhosh Na i fshihte vështrimet e kalimtarëve
Strehë i kishim fëshfërimat Dhe mornicat e argjenta nëpër trup. Ai merrte lulkuqet e faqeve të tua E i shpërndante gjeth më gjeth
Tani plepi i ka fikur dritat Të heshtur hapojmë pranë kujtimeve
Vjeshta i ka fshirë stinët Me këpucët tona të pamëshirshme
Shkelim gjethet e verdha
dhe vezullimet
KLAN
E tërhoqa litarin e lumit e hodha në
Det. Ishte i gjatë Që nga akulli deri te rëra.
Herë herë humbet humnerave të detit
Por nuk këputet.
Gen i pavdekshëm
Lesh leshteriku
Që nga shiu,
Deti
e rëra.
“ STOP”
Emri i poetit është një rrugë
S’ka rëndësi në qendër apo në periferi të qytetit
Nuk ka shenja orientuese
as për makinat luksoze as për opingat me baltë
Rrugë që shkelet, shkelet, shkelet
Shkelet
Nëpër hapat e vashave sykaltëra
Çelin zambakët e zemra çahet nën ritme takash
Në kthesat e natës varur qendron hëna e plotë
Që të mos e humbasin rrugën kalimtarët
STATUJA PREJ RËRE
(60 vjetorit tim)
Në 60 gropa të shkuara
Këpucët e mia
i kanë tradhëtuar gropat dhe majat
Duart e erës sajojnë statujën time prej rëre
Nuk vajtoj çka humba
unë i fik qirinjtë me një gulç frymëmarrjeje
Të gëzuar.
Të errta xhamet dhe ujvarat e diellit
I trishtuar shpirti i dallandyshes…
Hyj e dal eklipseve të vetvetes
Dhe nuk e di
Zbres drejt një honi prej rëre
Apo ngjitem drejt një mëngjezi të shndritshëm…
S’ PIRO- S
(një greku që fillonte dhe mbaronte me “s”)
S - bashkëtingëllore e pazëshme
Kulpër e spërdredhur para emrit tim mijëvjeçar
Në vite e vite zgjat buzët prej Jude e
gurët e kufirit ha me dhëmbë. Nga ankthi
kapërceu mbi trupin tim M’u kokleps si apendiks
në fund të barkut
U ngop me qelbin e vet
E pret, e pret
Të pëlcasë.
BALADA E PLEPIT PLAK
I ishte ftohur limfa në damarë
E zogjtë rrallë e më rrallë
Kujtonin foletë e vjetra.
Një pasdreke, një nuse i vari të linjtat
Në degë, plepi plak u drithërua
Dhe e shtyu vdekjen më tutje.
Le të jem, tha
Shkopi i një yllke, – rreze e praruar.
Në mëngjes befas thirri sopatën e vdekjes.
Merrmë, – i tha i vendosur
- i pashë të gjitha:
Dhe pjalmin e luleve kur isha mbushur me gjethe e lastarë
Dhe foletë e pranverës
Dhe zogjtë që tringëllinin kujtimeve,
Merrmë, pra!...
U drithërua që nga rrënja në gjeth
U la lamtumirën e muzgut të gjitha dashnoreve
Dhe qetë qetë ra me ballin në baltë.
KOHA E AKULLIT
Mish i huaj
akull akullnaje
gungë e frikshme
Na kish mbetur në mes të trurit
Rrumbullakosur
si syri i kuq i Ciklopit pas djegies së madhe.
Brenda në shpellë.
Durimi është gjuhë e huaj
Me thikë të mprehtë iu vërsulëm trurit
Deri në përgjakje ia rinxorrëm syrin Ciklopit.
Të kristalta erdhën pastaj metastazat.
Bora na ra në pëllëmbë të dorës
E ngricat egërsisht sulmuan eshtrat
Ciklopi i egërsuar përditë hedh shpella akulli
E deti i mbyt barkat tona.
QIPARIZA DRITE
Zjarri i shpërfilljes doli në majë.
U dogjën livadhet e fjalës
Si bari.
Një re e terrtë tymi rëndon në qiell
E pozon
Fantazma poetësh
Si qipariza drite
Në heshtje Të vetmuar
zgjaten drejt qiellit
E pyllëzojnë pllaja netësh të bardha.
Fantazmat.
VIOLINA DHE HARKU…
Violina me harkun shaluar
Është një grua seksi
Këndon,
Vajton
e klith në mijra zëra
Harku mashkullor
I lodhur
bije
Gjer te tingulli i fundit.
Përsëri violina mbetet e virgjër
E përsëri pret
Vuan
hesht
Po gishtat ,
Gishtat kush i luan?
GURRA
Mali ,
Orë e çast ngarkon mushkat me dëborë
E fshehur nga dielli
i shkarkon drejt zemrës së vet.
Nëpër aortën e nëndheshme,
Mespërmes zajeve të kulluar
Qarkullojnë e treten balada, ulërima ujqish,
thëllëza të habitura e bilbila.
Shtatë trëndafila më poshtë
Vrullshëm ka shpërthyer e bija.
ÇIFTI PLAK I AP.nr.2
Ia ndjej zhurmën e flokëve kur
Ajo stis forma zambakësh
para pasqyrës së ashensorit
e zambakët e hirtë shprishen, shprishen.
I tij është bastuni
nëpër pllakat e bardha të korridorit
Dhe dora që i dridhet.
Zogj të lodhur shfaqen në xham
E tremben..
Nuk është hëna
Që pa Adami për herë të parë
Kjo kafe s’është e zezë
As ky filxhan nuk është i bartdhë.
PUSHTETI I BORËS
Dimri i egër, i plotë , i mermertë
U vendos nga unë gjer te guri i lumit
Pas xhamit të dritares
Përgatita planin e rrebelimit kundër tij
I vetëm isha me vetveten, misterioz
Mbaja në zemër diskun e diellit
Dhe mijra shatërvanë të kaltër
Do të shpërtheja nëpër ballkone e alabastra
Pa kuptuar
po ndihmoja pushtetin e ardhshëm dhe
I mundur hoqa dorë nga rrebelimi.
Hapat m’i mori lumi
Me trupin e ujtë
Rrjedh nëpër gurë bore.
GORRICA
Mars më mars i tregoja sharrën
I flisja për një dardhë të ëmbël për Dy bisqe
të rinj e të butë
Dhe një shami për t’ia lidhur plagën.
Por
Nuk hante gozhdë gorrica
Gjeth më gjeth kreshpërohej
Me inatin e gjëmbit të egër
Drizash e korbash e gjinkallash
Që grisnin fytyrën.Pragu i dimrit
kishte gjuhë tjetër. I ftohtë tehu i sopatës.
Priste .Gojëhapur oxhaku në vatër
Dhe ulërima e ujkut pas derës.
MITRA E SHIUT
Atje i lëshoj shigjetat nëpër natë
Pa marrë asnjë në shenjë. Si gjethet që bien në shi.
Erë jam Që fle në folenë e erës
Bora e yjeve Që bije pingul mbi ty
Breshër Që thyen rrasat e shtëpisë së vet
Ylber Me të gjitha ngjyrat e nuancat
Që harkon mbi brigje e humnera.
për një çast m’u duk vetja si poet
E luaj me shkelma e bërryla
Në mitrën e erës
Ku brofin trëndafila shiu.
BISHTI I BALONES ME NR. 55.
Pas bishtit të balonës i gjetën duart e mia
Alarmi arriti gjer në zyrat e larta të shtetit
Folën për shkelje kufiri nga një balonë e panjohur
Dhe për rrufe në qiell. Që u ngrit si rrufe
Në qiell të kaltër.
Nuk më besuan që balona
Qe mbushur vetëm me ajër.
Kur m’i prenë gishtat e përdredhura me fill,.
Më shpërthyen pesë currila me lëng të çuditshëm
Dhe, brenda balonës,
Në agoni dhimbjesh, në fjalën time
shtova dhe një zog
Mjafton! – thirri hetuesi triumfator –
Një ajër dhe një zog, përbëjnë një paragraf
…I pandehuri u gremis në gojën e vet…
ZAGORIA
OSE PORTRET ME NJE GROPE NE MES
Gropë dhimbjeje në kraharorin tim
E pafund. Brenda meje
Fërshëllen era cingërrime. Fluturon
Pëllumbi i egër.
Të habitur Grinden përrenjtë
Dhe hidhur pikon rigoni në vjeshtë.
Rrallë e më rrallë këndon gjinkalla
Që gris fytyrën në heshtje
Dhe trumcakët fëmijërisë
më fshihen nëpër gjethet e erës
Portret i përbashkët si vëllezërit siamezë
Me një gropë në mes
Pa trajtë Pa karakter
Dhe mungon Salvador Dalia
Të na bëjë të njëjtin portret.
ËNDËRR…
E pashë përsëri sonte
babanë,
Qëndronte në stolin e tij në guzhinë,
Pëllëmbat prej dheu i rëndonin në gjunjë,
Jashtë binte shi me baltë,
E xhamet e natës kuqëronin frikshëm,
I kaltër ish si bora,
Në ballë kish një çarë rrufeje
Përtypte duhan të grirë
E qante,
Qante nën zë
për ca zënka të kota me mëmën time.
KAMBANA
Të gjithë hodhëm nga një dorë
në derdhjen e kambanës
Na duhej një shembull
Shtuam dhe metale të tjerë në tunxhin e saj
Dhe zëra nga tanët
Dhe nuk e kuptuam
ç’zgavër lamë bosh në laringun e saj metalik
Kumbim kambane nuk patëm kurrë
Zëra të ngjirrur
Grahma gurmazi të çarë
Mbi një pirg të vdekurish harruar.
MALI I KAPROLLIT
Ai vetëm gjuhën e gurit dinte
Lëndën që thërrohet e prishet.
Prej vetes e lëshoi
E si gur e rrukullisi në brinjë.
Po ai ishte prej mishi
Dhe i gjeti shtigjet
Nga shkojnë kaprollët
Mali gaboi
Dhe kur i ngriti kurthe të bardhë
Këmbën të thyente në zgrip të prillit
e të harrohej në ndonjë gropë bore.
Kaprolli kish ca të fshehta në sy
Në gji ca fjalë të arta
Gushës i gurgullonin rrokje prej lotësh
Që vendlindja të mos mbetej pa balada.
Mali i lartë humbet e harrohet përditë
Veten ha në shi e dëborë
në hartën e re topografike
Vizatuar është një kaproll
PROTAGANIST
Një turmë qensh shkoi me vrap
E la gjurmët
Mbi asfaltin e patharë.
Të gjithë kalimtarët e mëvonshëm
Hap pas hapi kalonin nëpër putra të ngrira
Historia i tha të gjitha, ç’kish për të thënë
Dhe për fajin e asfaltit
Ngjyrën e qenve, borën, shiun e erën
Po, asnjë fjalë për
Të lehurat dhe dhëmbët
Që kishin vënë vulën mbi ngjarjet.
ENIGMË
Pas gjethes së fikut
Nuk fshihej dora që këputi mollën
As buzët që ia thithën lëngun
As dhëmbët që e kafshuan
...
Poetët e kuptuan thelbin tragjik
Që e priste njerëzimin dhe nuk qëndruan
Krejt lakuriq si Adami e Eva.
Gjethen e fikut e ngjitën në ballë
Që dikush të zbërthente enigmën
Larg organeve mëkatare,…
Te rrudhat.
KJO THIKË…
(L.Aragonit)
Nuk e di kush ma nguli këtë thikë në Zemër
Ndoshta një fëmijë i uritur,
Një nuse që shiti trupin
për të blerë një fustan nusërie
Tehu i mprehtë thikës është
Nëna ime Që e kam braktisur
Tani kam tri barkushe me gjak të kulluar
Të thellë si nata
Që nxë miliona fëmijë të uritur
Miliona nuse që presin një fustan nusërie Dhe
të gjitha nënat e braktisura
Kirurgët që më prisin në sallë
Me bisturi në duar
Më kot do ma çajnë barkun e natës!
Jam i pavdekshëm nga çdo dhimbje tjetër
Në zemër kam këtë thikë,
Burim i gjakut të kulluar.
DRITA MBI DUAR E BABAIT
Ngujuar në mermer
Dremit brenda ëndrrës sime babai
I ftohtë
I bardhë
Me flokët anash si të miat
Me sy e buzët prej bryme
Përsipër mbi varrin e rëndë i rritet bari
Dhe dielli ka ngrirë.
“Cliromë nga ky nder – më tha sonte në gjumë -
Janë shumë të rëndë këta blloqe mermeri
Nuk e dua as emrin, as fotografinë
E mbërthyer në beton.
Nëse nuk mbjell dot një pemë pranë meje
Lermë të më mbulojë bari i gjelbërt
Ta shoh me sy shiun dhe ylberin
Lulja e gjëmbaçit si drita
Të çeli mbi duart e mia…”
METODË PËR LEXIMIN E HIRIT
Nëpër duar po ua lë lëndën e ftohtë
Hermetik është uji dhe Koha e shkuar
Kujtimi i hirit
Prushi
Dhe flaka
Nëse doni të lexoni fletët e hirit
Ringjallni barishtet, degët e gjethet
Trungjet e trashë që kam djegur
Temperaturat. Gjeni flakët e kaltra
E prushet ku dimrat ngrohnin duart.
Edhe me një qiri te syri
Mund të shikoni zambakët
të çelur. Metaforat e shuara pemët.
Me një fije shkrepse ndizet çarçafi i mwkatit
E merr trajtë vdekja e poetit dhe e diellit
E butë, fosforeshente Që fëshfërin
nëpër sythe mëndafshi Në një natë të bardhë
Prej hiri
Dhe letre.
POEZI HERMETIKE
(Ungaretit)
Ti je vajzë prej letre. E palexueshme.
E bardhë shkruar me të bardhë. Nuk e dija
Që kodi i leximit Ishte puthja ime në kërthizë. Sytë e tu shkrepën
Dhe mu hodhën në qafë.
Pasdita e Adamit ishte e qetë
Flokët e tu
mbanin erë mollë.
PËR TY
Ditën të bëj roje pranë fytyrës sate
Të ta ruaj ballin nga dielli
Dhe syrin nga bora.
Natën do hipi nëpër degët e hënës
T’i shfletoj të gjitha fletët e njoma.
T’i gjej duart e mia
Dhe të ndez një cigare
ZGJIMI I BLETEVE
Para meje iku mitra e zërit tim
Tani fjalët më
Rrukullisen si gurë
të ashpër. Miqtë e mikeshat m’i presin në dorë
E gurët më bëhen qingja të bardhë.
Kullosin barin e njomë
Që mugullon në livadhe të gjera
dhe kudo Zgjohen bletët e vdekura.
MIQTË
Me laps të kuq heq viza
Mbi emra shokësh e miqsh. Në heshtje
I shtyj tutje në honet e harresës. Ata
Më ngrihen si lugetër në gjumë Më plagosin
Me thonj në shpirt, e zhurmojnë.
Eci gjithomë e më tepër drejt vetmisë Dhe ngec
Nëpër klithma violinash e gërmadha
poezish të harruara.
DIDAKTIKE
Nëse do të më puthësh, hiqi buzët prej bryme
çvidhose dorën e drunjtë
thirri shënjtorët prej mishi.
Të Ndezet sërish eshka e shpirtit
Të rrotullohet sërish globi Të dridhen meridianët Të çelin paralelet
Kështu e nisin lojën
magjistarët.
POEZI E HARRUAR
Copa copa këputur këtu e atje
Tek e përpjeta e thiktë,
Pas tufave të rralla të çajit. Atje
Flinte një nepërkë pika - pika
Atje m’u gjakos këmba nga sandalet me tela
Prerë rripa rripa nga palldëmi i gomarit.
Në plasën e imtë të një guri të bardhë,
Ku çdo mëngjes çmendej thëllëza
Kam fshehur dhëmbin e qumështit
Që me dy pika gjaku e prita në dorë.
Mbeti bosh dhëmbi i qumështit.
Një jetë të tërë
Pikë
–pikë
gjaku i ngrirë.
Poezi e harruar.
SHEJTANI DHE ZOGU
(Shakirës)
Sonte
Shakira këndoi lakuriq
Krejt lakuriq Sytë i vesonin
dhe nga qerpikët shpwrthenin copa yjesh e vezullimesh
Një gji i kërcente si kokërr breshri
tjetri hidh e prit nw duar spektatorwsh
Një nepërkë e hollë i niset nga mesi
Dredhon e i zgjatet mbi flokë. Zgjohet
shejtani në mes të shalëve
Dhe në çdo shkarje të belit
telat e kafazit një nga një i këput. Yjet përplasen
E digjen. Zezakët të dehur zezojnë.
Gruaja ime diçka pyet për këngën
...
unë them i hutuar : “ nuk qe shejtan
por zog...
JAM I SHËMTUAR
Ke të drejtë të mos më duash, e dashur
Më janë rritur gjymtyrët si përbindësh
Jam shëmtuar
Në zemër kam një vrimë të pashërueshme
Mbi shpinë një gungë si të Rigoletos
Mos më prit
Në portat e ngushta të manifestimeve tona
Nuk hyj dot
As dora dorës me ty
Me dëshirë
U përkulem vetëm pemëve të heshtura
Dhe fëmijve që qeshin
AUTOKRITIKË SORRE
Bëra ca kërcime pupthi mbi çati
Shpupurisa leckat e zeza në ajër dhe
Për inat të shqiponjës
Qiellin do ta shkatërroj-
thashë,
Jam e zonja
- por,
Kjo nuk është provë
qiell do të thotë pamundësi sorre
Ose shqiponjë
që mban yjet mbi shpinë.
GJURMËT E ZOGUT
(Montales)
Në oborrin tim me pllaka guri.
Shtresë e butë bore
Mbi të ca gjurmë të ndrojtura zogu
Të vogëla fare, hollake
Pranë e pranë kthetrave të maces.
Kryqe. E vija. E pupla. E rrathë që ndërpriten
Mbi dëborë. Të pambaruara
Të pa deshifrueshme. Si heroglife kineze.
Ndoshta zogu ka qenë i plagosur
A ndoshta kthetra e hollë
E kish prekur në zemër.
I mbërthyer në këto diagrama
ia preva kthetrat maces
Lus erën të mos fryjë lus shiun të mos bjerë
Gjer në fund
ta deshifroj shpirtin e zogut
shkruar mbi dëborë
ËNDËRR PELLGU
Pa në ëndërr pellgu sikur u fry furtunë
E turravrap me gurgullimë
U derdh pllajave të pjerrta,
Një çast
Shkumëzoi si ujvarë
Në të aguar
Një çift bretkokash i krokitën brenda barkut
Dhe u zgjua
Ashtu faqe më faqe
Me gulçet ofshamat myshqet e shushunjat
I tha vetes:
“Të q...nënën pse nuk je i vërtetë si në ëndërr”
FSHATI
Tërë jetën ndoqa këmbakëmbës
një dhi të bardhë Që e doja si diell
ia njihja dhe kakërdhitë
dhe gjethet që hante
në zgrip të shkëmbit.
Një ditë
dielli më plasi
si një kupë e kristaltë me qumësht
e ëndrra
më humbi
në ëndërr
“TEMPULLI I PLEQËRISË”*
Më në fund e gjeta pyllin
që kërkoja në Athinë. Nuk pashë
as shkretëtirë trungjesh të braktisur
as vjeshtën
të hynte e të dilte
për një gjethe e uritur
Orë e çast këtu vijnë gjyshër
me nipër e mbesa pas dore
Ndoshta
u tregojnë këtë trung stërgjyshor prej lisi
Që nëpër palcen e tharë
Fsheh një gjarpër të frikshëm
*- kështu quhet një pyll në Athinë
POHIM I NJË DIELLI TJETËR…
i grisa të tëra ato që kam shkruar Mbetën
vetëm kopertinat që s’janë të miat Si vjeshta
frutat dorëshkrimet
e mblodha grusht si letër të zhubravitur
të kaltrën e qiellit Ia përdhrodha qafën diellit
që ndriçoka për të tërë(!)
që breshëri dhe shiu të mos
bien kur të dua unë
që të mos fshihen pas meje shpirtrat e pistë
që akujt e urrejtjes detit të shkihen si kripa
(Nisja nga fillimi është fakt i kryer
Si fryma…).
Athinë- Tiranë 2001-2010
Subscribe to:
Post Comments (Atom)
No comments:
Post a Comment