URDHERI I LOTIT
( Poezi )
NGA PIRRO LOLI
URDHËRI I LOTIT
“Po të kesh dy bukë
njërën jepja të varfërit,
shite tjetrën
dhe ble ballsam
për shpirtin “
(proverb indian)
CILA JAM UNE
Mos prisni të ngre sytë lart
t’u tregoi qiellin
Jam vetëm një shërbëtore
një laps në dorën e Zotit
një re e bardhë që e shtyn era
Dhe duart i kam në baltë.
Banoj kudo.
Në çdo plagë që pastroj
në çdo fëmijë që ushqej
Në çdo trup që vdes
Atje ku preket Krishti me dorë.
Shënja dalluese nuk kam
Veç një heshtje të gjatë
dhe ballin e dëshpëruar
e lidh me shami.
TRËNDAFILA BORE
Motër do të thote “mungesë”
që s’ka ndierë ledhatime
që s’ka provuar puthje
që s’ka përkundur djep
Motër do të thotë
edhe mjellmë
edhe lule manjole
edhe valë e përgjumur
që qesh.
Mbi gjinjtë e bardhë
Këndojnë fllade virgjireshe
dhe ulin faqen
yje të plagosur.
Mbi varrin e saj
në çdo stinë
çelin trandafila bore.
VRIMA DRITE
Kish mbledhur yjet e dhimbjes në sqetull
Si Prometeu zjarrin
Brinjët iu bënë gunga-gunga
e krahërori iu mbush
me tjetër flakë
E duruar si pemë
nuk ndiente plagë sopatash në trup
As sqepin, as çapinjte e shqiponjës
në mëlçi.
Të vetmet dhimbje,
gozhdët në trupin e Krishtit
që çelin vrima drite
tek unë e tek ti.
NË SHTËPINË E PLEQVE
Të pagojë.
Një maldhimbje kyçur
thellë gjoksit
thellë.
Pleq të bukur e të shëmtuar
të ngulur
të braktisur
të vetmuar.
Natën humbasin nëpër hone ëndrrash
zgjohen të trembur
e artikulojnë përçart copa emrash të njohur.
Ditën,
orë e çast
kthejnë kokën nga dera.
Dera i theu menteshat.
Pleqtë e urtë me zemër vrimë
Presin…
Presin…
Presin…
Kapërdijnë heshtjen si kafshatë të hidhur.
e koten
koten…
koten…
Me kokën nga dera.
ZOGU I HUMBUR
Vetëm hëna në dritaren e spitalit Nirmal Hridej
e zbehtë, e zbehtë
Zog lakuriq
dridhet
përpëlitet
si frymëmarrje e fundit
“ Shtëpia e Nënës” në Kaligat
as mjekë, as shtretër…
Jeta, pezull në dy duar
lëkundet nëpër tezga
dhe befas rrëzohet në një gropë
të ngopur me natë.
Të sëmurët presin radhën
të dëgjojnë emrin
ta hipin hënën në tezgë
t’i ëmbëlsojnë plagët me pupla hëne
ta shtrojnë varrin me njolla drite
Ashtu,
faqe më faqe të vdesin
me zogun e tyre.
Dita,
pupël e këputur
nata,
zog i humbur …
LULE KRISHTI
Fytyra fëmijësh
portokaj të fishkur
çahen nga plagët
Një dorë Nëne
i mjekon me ballsam mëllage
këputur nga shpirti
Nëpër faqe të xhamta
u çelin Lule Krishti
KLITHMA ERE
Shkurre rënkimesh
pemë dëshpërimi
shushurijnë në heshtje
si shatërvanë të zinj
Aty shuhen
Aty klithin
shpojnë qiellin
e shtangen si qiparize.
Mbi të qarën e shiut e të erës
një magjistare me të bardha
përqafon qipariza shiu.
E tretet
tretet si psherëtimë
Nëpër klithma ere.
KËNGË E TRISHTUAR PËR PEMËT E KALIGATIT
Në skelete gjethesh
e bisqesh
e degësh
e trungjesh
shuhen stinët
e vërshellen lebra.
Një zog me sqep të gjelbërt
cicëron këngë gjethesh
të këputura.
ZEMËRIMI I PERËNDISË “KALI “
( Baladë )
Gishti i vetëm i perëndisë “Kali ‘
ra nga qielli ogurbardhë.
Atje u derdh Gangu
U ngrit Kaligati
Dhe tempulli madhështor
ku pagëzohen limdjet, martesat
e arkivolet digjen në mister.
Nuk dihet pse “Kali “ u zemërua me njerëzit
Dhe kërkoi t’ia kthenin gishtin e vet.
Asnjë nuk flijoi
Askush s’e preu një gisht
ta dërgonte lart.
Perëndia “Kali” e zemëruar dërgoi lebrën
Që çdo perëndim dielli kafshon
Mijëra gishtërinj të pafaj
* * *
Ia preva te katra thundrat
Kalit tim të bardhë
E nisa vrap për Kaligat
Me gishtat e mi të gjakosur
kapur me jele të shkumëzuara
Trokoj.
Nëpër kalldrëmet e qiellit
Ta zbus zemërimin e “Kalit”…
Trokoj, trokoj…
KALUJA
Të vetët e braktisën Kalujan
E lidhën me zinxhir
Në një kasolle të largët
e lanë të vdiste.
Gjymtyrët ia hëngri lebra
Ka vetëm një kafkë
Një planet të zbardhur
Mbetur në trung
Dhe zërin si shpellë.
Banon në pleqtore
Në një karrocë fëmijësh
Dhe qan në heshtje
Dhe qesh tmerrësisht
Dhe këndon një këngë dashurie
Me zërin si shpellë
Për një çifute që desh.
Karroca e vogël shtyn
Ditën pa diell
Natën pa yje
Kafkën e zbardhur në trung
Dhe një ulërimë dashurie.
DUART E NËNËS DHE LYPËSI LONDINEZ
Kockat e thinjura të bërrylave
i dridheshin
I dhashë dorën
Nuk ma lëshonte.
- Çdo vëlla, ç’të mungon?
- Nuk dua bukë, - tha.
Kam shumë vjet që dora ime
S’ka prekur dorë njeriu.
* * *
Damarët e dorës së saj
Rrahin në damarë të lypësit
Rrjedhin
Gurgullojnë
Çahen e shkrihen
Në dorën e ftohtë.
URDHËRI I LOTIT
(Padma Shri )
Medalioni i artë
kish tre pika loti prej diamanti.
Hëna e plotë
Kish zbukuruar ballin
Qe këputur nga dhimbja
E u mbështet në gjoksin e nënës.
Nënë Tereza
E mori në duar, e përkëdheli
Si foshnjë të sëmurë
E i dha frymë ;
E ngashëruar me hapa të lehtë
Si lambadhe e bardhë që digjet
Ia vari statujës së Shën Marisë
derdhur në xham.
“Trupi i Virgjireshës është prej loti, - tha
Kësaj i takon gjithçka”.
Në medalionin prej hëne
Vezullojnë tre pika loti prej diamanti.
GËZIMI ËSHTË NGJITËS
Trokiti në portë si ëngjëll
e dridhej nga gëzimi
Mezi shqiptonte emrin tim
kur më zgjati doçkën e bardhë.
Kish dëgjuar se Nënë Tereza
s’ka sheqer për fëmijët
e kish mbledhur racionin e javës
në një zarf.
Atë ditë
Çelën miliona fëmijë të bukur si bari
e fushat e dheut
i spërkata me sheqer.
MOSMIRËNJOHJE
e kish humbur ylberin në atdheun e saj
shirat binin pjerrtas
të hidhura e
endrrat i zgjoheshin duke qarë
lulekuqe plagësh i përcëllonin trupin
dhe në Shkup
dhe në Prishtinë
dhe në Tiranë
për Shqipërinë ndezi dyzet diej
por ajo
e kish mbushur qiellin me hithra
e për shënjtorët e vet s’kish
as dritë
as vatër
as varr.
TREGIM PËR NATËN E SANTOSHIT
Në ballë kish dy puse të thellë
të palëvizshëm
Në bebet e syrit dy kristalë akulli
të zinj.
Në këmishë, një dore e kujdesshme
Kish qëndisur me fill:
“Santoshi është i verbër”
E në prag të portës sonë
e kishin lënë.
Na shikonte sy më sy
Na njihte me të prekur.
Me dhjetë bebeza të ndezura
Nëpër gishtërinj.
Një qepallë dielli
Një qerpik hëne
S’gjetëm dot.
As malet nuk i shikonte
nga dritaret e nxira.
Santoshi ish fundosur në natë
Në dy gropa të thella
Në dy puse të zinj.
ËNDËRR ME KËMBË MERIMANGASH
Atdheu i saj nuk i hapi udhë
As të ngrinte “shtëpi nëne”
As të varroste Nënë Loken dhe motrën e saj.
50 vjet.
Nëpër hone ëndrrash
Përlesheshin merimangat e harresës
Trishtimit dhe shpresës.
50 vjet.
Zambakë të përdhosur
Lule leckash
Këmbë merimangash majeprehta
Përgjakën kujtesen
Që klithte
50 vjet.
Drinat kryqëzonin mjekrat si thika
Buna budallaqe
Villte mëlçinë në det.
50 vjet.
Ishin thinjur merimangat e heshtjes
Kur ajo, ra në gjunjë,
Puthi dheun e tha :
“Të kam falur Atdhe ! “
Ishte një ëndërr e gjatë
Me këmbë merimangash të gjakta
50 vjet.
SHTEGËTIMI I SENDEVE
Çdo send që prekin duart e saj
Ngrohet
Zgjohet
Dhe i mbijnë krah.
Ajo e di
Bota ka vetëm një përmasë
Qiellin
Dhe gjurma zogjsh shtegtarë
TREGIM PËR GITËN
E kishin shpëtuar mes flakësh.
Kish humbur prindërit.
Ish djegur.
Përcëlluar.
Ish zemëruar dhe me Zotin
dhe me Nënë Terezën që i rri pranë.
Ngulet në dritare
Dhe s’do të shikojë njerëz me sy.
Zoti është i keq, - thotë.
Pse më dhuroi dhimbje
Nga dhimbjet e tij ?!
Gita s’ka mish në faqe
Sytë e saj
Mbirë si dy komça në kockë
Thyejnë xhamat e dritares
E tejpertej qëllojnë qiellin gri.
FRIKA E ZOGUT
E gjeta në udhë
trumcak i vogël i saporënë nga pema
Balli i zbehtë si qelq
në orbitat e shqyera nga uria
dy qirinj të hollë
që shuheshin.
I dhashë një copë bukë.
Me dy gishta zogu e bëri thërrime thërrime.
- Haje të tërë, - i thashë,- ke uri
- Kam frikë,- tha zogu,- …kam frikë…
- dhe pasi ta ha do kem uri.
U trembej thërrimeve të bukës
hapte e mbyllte sytë
sikur në çast do të fluturonte në degë.
M’u dogj në duar si ashkël
pema ra e
një krismë shpoi qiellin me vrimë.
GJYSMËFYTYRA
Një grua
një grumbull leckash rënkonin
pranë koshit të plehrave
në mes të Londrës.
gjysmën e fytyrës
ia kishin ngrënë milingonat dhe minjtë.
Renda si i çmendur
kudo u përplasa me
gjysma zyrash, gjysma udhësh,
gjysma pemësh, gjysma njerëzish …
Asnjë fytyrë e plotë
në qytet.
Të gjithë ishin mbuluar
me milingona dhe minj.
MOSMARRËVESHJE ME PRESIDENTIN
Atdheun e saj e la në fund të udhëtimit.
Ecte nëpër gropat e qiellit të copëtuar
me një drithërimë në shpirt.
Në krah kish presidentin e ri
që i ngecte këpuca nëpër balta
rrethuar nga fëmijë të leckosur
që lypnin.
- Do fillojmë të ndërtojnë rrugët dhe dritat…
- Duhet filluar nga qielli, e ndërpreu ajo
- Këtej ka kaluar diktatori,- tha ai
- Të vdekurit duhen falur,- tha ajo.
ËNDËRRAT E KËPUTURA
Natën që shkoi
u thye llamba me vajguri
shtëpia e pleqve mbeti në terr
Hëna e shqetësuar
kaloi me bërryle nëpër korridore resh
e qëndroi në dritare.
Motrat e morën në dorë
si abazhur të artë
e vendosën nëpër ëndrra të këputura.
ZONA E VDEKJES
Në Kalkutë
kapanoni i vdekjes tund e shkund kanatet
Egërsisht.
Nënë Tereza, veshur me të bardha
E merr vdekjen në duar
i fërkon qepallat.
Në sytë e saj të kadifenjtë
Drita pi dritë.
Një kokërr e ngrohtë loti
Mbi buzët e përthara
E vdekjen e zë gjumi
Të qetë.
NËNA E BRAKTISUR NGA I BIRI
Më mbante dorën në dorën e saj
Dhe nuk mundi të më fliste
Asnjë fjalë.
I kish ngecur në fyt
Një kockë nga kocka e saj
Një zog me kthetra
që e mbyt.
Nëpër faqet e zbehta
I rrëshqisnin lot të plumbtë
Nga goja e kyçur
Jarg vetëtimash.
RRËNJËT
Ajo dëgjoi që u grindën për të
Dhe një çast u drithërua.
Si shenjëz fantazme u ngrit nga varri
E duke buzëqeshur tha:
“Unë i di ku i kam rrënjët
Dhe gjuhën
Dhe varret.
Te Kostandini i madh ilir
që ligjëroi Krishtërimin,
Te Shën Jeronimi
që i dha Biblës gjuhë perëndie,
Te Niketë Dardani,
Himni i parë i Krishtit, “Te Deum…”
Te Danakti, emërshenjti i Vlorës
që për besën e Krishtit i prenë kokën,
Te Shën Asti i Durrësit dhe i Ulpianës, martir;
Te Papa i Parë i shekullit të parë,
Ebuterit nga Preveza,
Te Papa Klement Albani…
Tek të gjithë mbretërit ilirë.
Unë i di ku i kam rrënjët
Dhe gjuhën
Dhe varret
Nëse pranoni që atdheu juaj është Plaga
Atje kam lindur unë,
Atje është atdheu im.
Asnjë pasaportë s’mbaj me vete
Veç një kokërr loti në buzë,
Unë i di ku i kam rrënjët
Dhe gjuhën
Dhe varret.”
ZOGJ TË URITUR
….E kam një kokërr meli
për zogun e uritur
një kokërr meli
si tingull…
PIRRO
Kokën e kam akoma me gunga
ndoshta nga djepi prej rrapi.
Në gërmadha linda
e kokën ma përplasën në një dhogë të sertë.
Nëna ime,
e pagjuma,
e pangrëna
Herë me thërriste “yll “ e herë “mbret”…
Yje mizore kishin zbritur nga malet
e me bezdi shkruan në një listë
një foshnjë me tepër
që duhej mbajtur në zap.
Yjet kishin brirë
e blegërimin në tufë si të marrë.
Nëna më ushqente fshehur
pikë, pikë
Vetëm me qumështin e deles llajé.
Gjithë jetën në një fushë të egër bilardoje
luajta me brirë dhe yje.
Vërtebrat e mia me karambol
i groposja në hon.
S’kam të bëj me yje të molepsur
as me Pirron mbretin ogurbardhë
Jam ky që shihni
i trishtuari që mbledh bar për delen llajë.
URIMI I NËNË TEREZËS PËR MUA
Miliona fjalë e shkronja
Si bletët
Më zhurmojnë në vesh.
Në gjëmba trëndafili ngecin
më shpojnë
më grisin
e flenë qark syve të mi.
Gjilpëra të akullta
më çajnë buzën e prushuritur
e tretën në jerm.
Netëve të jargavanta
humbas
përpëlitem
vdes.
Ringjallem nëpër hoje ëndrrash prej mjalti
e thumbat e helmit
më therin në shpirt.
Ajo,
më vë dorën mbi ballin e nxehtë
e thotë :
“Lum ti, biri im
që dhimbjen e ke me krah e me fletë.”
STATUJA E LIRISË SIME
Si lypës
me dorë të shtrirë
e mora racionin e lirisë
dhe u ula ne një majë gjëmbi.
Fleta gjatë me premtimet
faqe më faqe si me detin
Kur durimi m’u bë me brirë
u thinj e u myshk
me duart e mia
mora pak qiell, pak det
dhe ndërtova vetveten
ose statujën e lirisë.
Një pulëbardhë prej kripe
në shi tretet e shkrihet
në qiellin e ftohtë le shkronja të bardha
pëlcet
e
digjet.
VJESHTA
Gjithë natën në oborr kulloi lëngu i hënës
“llamarinat e tetorit trokëllijnë nga era”.
kokrra e rrushit shtrydh bletët e fundit
Fluturat e verdha fluturojnë gjeth më gjeth.
Piktor i çmendur, vjeshta
ngriti flokët përpjetë
papritmas i prishi të gjitha ngjyrat
e i treti stinët
Më kot rezistojnë gjethet e dushkut
të lodhura, të ndryshkura bien përdhe.
Buza i dridhet jargavanit
mbështjell kokën me duar
qan e fërgëllin…
U dorëzuan të gjitha ylberet
U lagën zogjtë në sqetullat e erës
u murrëtuan pllakat e oborrit
pluhuri i diellit u zverdh.
U përmbys një shportë e mbushur
me gjethe e trumcake të plagosur.
Në qelqet e dritares
troket një cicërimë zogu
me një krah të lagur
fluturon e bie pa adresë.
Fustanet e holla brofin nga era
vajzat kafshojnë buzët të turpëruara
buzëqeshin me vete
e shalët u feksin që tej…
GISHTAT E FRIKËS
Me thonj e me dhëmbë
më kot mbahem i mbërthyer
në këtë shkrep të egër
këtu.
Mendimi im
i ka shtrirë shinat
drejt stacionit të fundit.
Një ëngjëll
më vë dorën në sup
e më tërheq drejt detit
me buzëqeshje blu.
I preva gishtat e frikës
I këputa spirancat.
Një barkë e bardhë lëkundet valëve
dorë për dore
me ëngjëllin tim gënjeshtar
Kam vetëm një frikë :
Pulëbardhat
të mos më arratisen nga përralla.
ATDHEU OSE NJË GUR … DHE NJË FYELL…
Ashtu të vogël, të vogël fare,
të copëtuar,
e ruajta në sy si pika loti;
Ashtu të madh shumë
por të mbytur
e kërkova nëpër mendime deti;
Ashtu të bardhe si bora
(që lëshon orteqe për bijtë)
Ashtu të zi si nata
e spërkata me yj…
por kur ma grabitën të mitë,
ma zhveshën e ma lanë lakuriq
diçka mora dhe unë nga atdheu
dhe ika
i mora ashtin
të mos ia prekin krimbat,
(lashë zemrën
të mos i mungojë buka dhe kripa )
mora dhe një gur
për të mbjellur lule
dhe një fyell
që më duhet për të qarë.
SHPELLA E VETVETES
Në kopshtin tim mijëravjeçar
si egjër
është rritur respekti për fisin
ushqyer me gjethe të rena e të kalbura
Gen i lashtë prej balte
rrënjë e moçme bishtore
bisht miu mbuluar me qime thithëse
që më mban të lidhur.
sy ciklopi me qerpikë metalikë
që më përgjon si prozhektor
gjithandej në bodrumin e kështjellës sime
ia nxora syrin ciklopit
e qorrova tokën
u fsheha në barkun e një dashi
e dola nga shpella.
AMBASADORJA E PËRHERSHME
Nënë Tereza,
Sërish e sërish kthehet në gadishullin e sertë
I theu gërshërët ziliqare në hartën e Ballkanit
E zbut urrejtjen e patretshme
Digjet si yll në natën prej guri.
Në vend të çantës diplomatike
Shpirtin e saj
hap fletë-fletë
Në udhëkryqe korbash s’ka qiell
Ndaj lutet, ndaj falet
Për tiranët dhe viktimat
Tek një piramidë çel një lulëkuqe kujtese
Te kufijnjë e feve një degë ulliri
Midis kufomave
Një buzëqeshje.
Fllad i lehtë në buzë lulesh
Afsh i ngrohtë në dëborën e trishtë
gjuhë kambane në bronx martirësh
Sa më tepër nata nxin
Aq më tepër yjet ndrijnë...
BALADA E LIRISË
Ka dy skaje liria
mua dhe detin.
Prej shiu jemi të dy
vëllezër mizorë
përqafuar.
Të kulluar, të kripur, të ëmbël
rënkojmë.
Aty klithim në sqep pulëbardhash
Aty ngrejmë dallgë
E sprapsemi trishtuar.
Zigzage rrufesh na rrëshqasin thellësive
kurrize peshqish
si shkarravina drite.
Bashkë me ujërat e pista
që zbresin nga bregu
tretim tufa yjesh
me xixa e aromë.
Dy delfinë të dashruar
na hidhen në duar.
DON KISHOTËT
Fytyra të vrerosura janë poetët
si Don Kishoti.
Kalërojnë nëpër erë
e kthehen nga betejat të qeshur
Me kokën në shtizë.
Një shpatë të kaltër kërkojnë
Një tingull
Një pikë mbështetëse
si levën e Arkimedit
T’i lëvizin gurët në qiell
T’ia ndryshojnë rrjedhën planetit.
Në gjakun prej vere
Mbyten poetët.
LOJA E DRITËS
Poçi i llambës plot manikyra
princ i krekosur në lëmin e vet
rrethuar me iluzione dielli
e trëndafila.
Insektet e verbra nxitojnë
të puthin dritën,
digjen dhe mbeten si jashtëqitje mizash
në faqet e qelqta.
Një poeteshë sykaltër
këput një lulëkuqe,
sapo e vë në flokë
i mbetet një karficë e zezë
që shkoqet si shkrumb.
Tutje është fytyra e diellit
në trojet kaltëreme të hijes
ku mërmerijnë gjethet e ullirit
ku qajnë shelgjet dhe bliret.
Në gjethet formë flake
dita dhe nata përqafohen
ndahen
e kryqëzojnë shpatat.
FJALA ËSHTË BURG
Kollona të rënda strofash
me korridore vargjesh hekurash të trashë
konstruksione rimash me varëse në grykë
bashkëtingëllore në pranga
e zanore që klithin.
Po poezia?
“ Nuk e di,
Nuk e kam takuar !”
E unë ëndërroj një limë, një sharrë
dhe një dritare në qiell.
Ta çliroj kanarinën në gur
Atë të pathënën që vuan
Të beftën
Kristalet e brymës
jo shiun.
AERODROMI “NËNË TEREZA “
Këtu avioni rrëshqet mbi pista plagësh
Kodra e male
lozin me pasa vatëtimash
e qielli qesh.
Në kullën e drejtimit
shqiponja me syrin e sertë
Nuk zemërohet me qiellin
e zogjtë e vet nuk i vret.
Policët dhe doganierët
këtu
duhet të vishen me të bardha ;
avionet që ulen e ngrihen
të jenë pëllumba
me pupla mëndafshi.
BALADA E BAJAMES
( Një malësori )
I
Kurrë s’kish pjellë frutat e saj
e egër dukej bajamja e butë.
Era e malit e kish lënë shterpë
suferinat e ngricat ia hanin lulet
në syth.
II
Qëkur kish zbritur në qytet,
lodronte në erëra të ngrohta,
mëngëshkurtër dhe në janar e në shkurt…
E ju përskuqën mollëzat në faqe
befasisht shpërthyen lulet e ngujuara.
Të trëndafilta
vetullshkruara
me syçkat e kaltra e rozë.
E vetëdashuruar ëndërron
frutat më të shijshme në botë.
III
Peng e mbajti malli për shkrepat e malit
për ujëvarat e akullta
orteqet
Gërmon kujtesën kur s’lidhte fruta
por, ama,
heroikisht qëndronte e drunjtë
dhe kur sopata e priste për samar mushke …
IV
Brenda honeve dhe damarëve të saj
Kapilarë të egër, misteriozë
Kacafyten, përleshen me kapilarë të butë.
Lule mornicash prushërojnë së brëndshmi
në një pështjellim drithërues
pikë-pikë rrjedhin në palçën e dikurshme.
V
Të hidhura
të athta pikërime,
thelpinjtë e rinj
mbyllur në kapakë të bronxtë
Si midhje.
LUGINA E LULËKUQEVE
Jashtë zgavrrës së trupit tim
Brinjëve,
Frushkullon kamzhiku i erës
Përbrenda më këndon një qiri i pashuar
Shpirti pëshpërit si foshnjë
Nuk kam ftohtë
As uri
As etje
Dhimbja është e imja.
Ti eja, vëlla
Afroji duart e ngrira tek unë
Në luginën e lulëkuqeve
Digjen petalet prej flake.
ËNDRRA E PRILLIT
Prilli m’i rrëzon muret
më çliron nga statujet e akullta
e, prej dore, më nxjerr nga ngujimi.
Prilli,
i bukuri, breshërori
qan e qesh me gjethe bore
e flokët e shelgut ia merr lumi.
Deti e di etjen time
Vetëm deti e mban premtimin e lumit.
Jam nisur. Mos më thuaj që muzgu i tij
është i zymtë dhe errësira e zezë.
Unë do të iki si puthje.
Në një barkë të bardhë prilli
do zhytem nëpër dallgët e detit
do loz symbyllurazi me yjtë
si në një arë me grurë të blertë.
Atë ditë që do iki
do të jetë prill,
do fle i qetë
dhe do kthehem përsëri
të bëj gabime
si era.
Ç’PO NDODH ME ZOGJTË ?
( Letër mikut tim, Primo Shllaku )
Ç’po ndodh me zogjtë, Primo?
Na dogji malli të shohim një bilbil
Në një gjethe ajri
Në një kryq ere
Të digjet.
Ç’është kjo mëri e grindje zogjsh, miku im
Ata që pollën vezë pashke
për djallin
Kanë mbushur oborrin e kishës
E psallin.
Miku im,
Ti e di sa e rëndë është nekrologjia e zogjve
Thuaju, të paktën,
të heshtin
t’i lajnë sytë
Ta shkundin baltën nga flokët.
Ç’ka ndodhur në qiell, miku im
Ç’ka ndodhur në ajër?
Një re e kuqerremtë
kaloi mbi tufa zogjsh e lëshoi
Një shi prej balte.
Dhe gjethet e plepit
I harruan vëzullimet, miku im.
Ç’janë ata karvanë atje poshtë
Që zhgërryhen nëpër lluca si derrat ?
Ah, ky shi,
ky shi me baltë, miku im !
MARSI
Në mëngjes
ia befi në kopësht
i egërsuar
me flokë trazuar nga era
Si kalorës e kish zhveshur shpatën
për betejën e fundit.
Në drekë
shikonte i trishtuar dezertorët e vet
copa akulli, ushtarë të zënë rob
notonin e shkriheshin nëpër ujra.
Në darkë
trokiti në dritaren time.
Ndershmërisht ma dorëzoi shpatën:
ish një degë kumbulle
mbushur me lule.
FILLI I JETËS SIME
Lidhur vetëm në një gozhdë
ngec
ngatërrohet
përdridhet
Asnjëherë tendosur në ajër
plotësisht i drejtë.
Nuset e bukura
s’i ndernin dot çarçafët e bardhë
e dallandyshet e kaltra
më binin në hon.
Ndaj e lidha fillin tim
dhe në gozhdën e tejme
në dy skalje ajri në mal e në det.
Ejani vasha të bukura
vareni fustanin e nuses në tel
çlodhuni dhe ju dallandyshe të vonuara
që u zuri bora.
EPIRI
Pi një kafe të hidhur
e në filxhan shoh
një pyll të prerë
një hartë të grisur
një bisht dhelpre të fshehur
e krahë korbash
që dridhen nga kufomat.
* * *
Jugu im bie nga jugu
por fjala ma mori gojën
si orakull i heshtur
përtyp duhan të grirë
dhe ha mallkimin e fisit.
* * *
Pylli ushqehet me histori shirash
që i ka në kujtesë çdo pemë
edhe e prerë
edhe e copëtuar.
UNË DHE LYPËSI PLAK
Mbaj këmbët para tij si para vetvetes
por mund të iki dhe më tej
të mbledh supet e pafuqishëm
e ta lë të uritur
nëpër saharanë e tij.
Unë dhe ai
dy kama të ftohta
në natën që vetëtin
krevatet tanë
dy tabutë të lëvizshëm
të njëjtat gjurmë lënë në pluhurin e zbehtë
nëpër Sahara.
ZOGJTË JANË TË URITUR
Mbi fytyrën e atij që ikën
ia bef një zog i zbehtë.
Në shikimin e tij të shuar
lë syte e mi
të duket i bukur
Ia mora urinë e uritur
Ta vë si gur fjale
Nën kokë.
E kam një kokërr meli
për zogun e pa ngrënë
Një kokërr meli
si tingull.
PRONA E POETËVE
Hëna
e vetmja pronë e tyre
me tapi.
Nëpër të bredhin poetët
Çdo natë, të pagjumë,
plugojnë në trupin e saj
si në ugaret e fermës.
Pas mesnate monedhën e verdhë
e hedhin si zare
për të blerë troje në qiell
Ndoshta një copë me yje të ndritshëm
e varre.
Ua grabitën dhe hënën
e rrëmbyen prej flokëve të florinjta
e hoqën zvarrë
e kryqëzuan
në mes të qytetit.
Gjaku i saj
i padukshëm si gjak ëndrrash të bardha
veson rrugëve të Tiranës.
BALADA E HËNËS DHE E BILBILIT
Qazim Shemes
I
Bashkë jemi larë
lakuriq në një pellg lumi
më derdhej e gjitha në trup
befas majë blirit digjej në fletë.
Mbi samar të mushkës
“hopa” e hidhte babai
me dy bukë misri në sqetull
të lodhur ktheheshin nëpër natë.
2
Lozonjare shket në të çara qielli
si sorkadhe e ndjekur nga një qen
për ty thyejnë kokën yjet
e një bilbil gushëverdhë u mek.
Push mimoze të përhimet në faqe
për një qerrato diell në planet
pranon vdekjen e amshuar
por atë që të vrau me puthje
s’e shet.
3
Kur nata mbyll kanatet
syri yt e çan tejpërtej
miliona copëra thërrmohesh në bar
të artat zilka tringëllin nëpër gjeth.
Ua ndeze gjirin leshverdhave
push floriri u sit përmbi vetull
pa dehesh e tëra në epsh
pa kridhesh në det për të fjetur.
Me bri i thyen qelqet e natës
gjersa ylli i mëngjesit troket
e varesh në gardh si kunave
të të rivrasë ai buzëplasuri që pret.
4
Princeshë e netëve të vona
Ç’pate me mua të zinë
me zilkat e arta pse më vret ?
Pse s’më dhe një puthje të kristaltë
pse s’më dhe një lulezanë
ta vë si stoli në xhaketë?
5
Përnatë e pi hënën si kininë
e bëhem shafran e helm
e kthej një filxhan raki balle
në qefinin e saj le të vdes.
DIVORC
1
Unë dhe atdheu
Dy vise gjumi
Të lidhur perjetësisht në ëndrra.
Çdo natë më këputen litarët
Në gjoks me shtypin hije;
hije të rënda varresh, vrasjesh
e statujash prej bronzi.
2
I dhashë një lamtumirë kristali
e muzgu
e ika shtigjeve të vetmisë.
3
Ndërtova një shtëpi të mbyllur
pa shkallë e dyer
pa dritare.
Ditën ndez dritat
Natën e mbush me cicërima
I dehur nëpër pentagrame të bardhë
luaj me një sqep dallandysheje
4
Do krijoj një lodër të vogël
të bardhë si ëndërr
me tinguj të tjerë
ndoshta do ta quaja “nënë”
ose “Atdhe”.
Do ndez një llambë
në kullën e boshatisur të shqiponjës
pastaj do mendoj për shkallët
që arkivoli im të zbresë ATJE.
KËNGA E GJARPËRIT
Gjarpëri më puthi në gojë
me gjuhën dyfishe pëshpëriti :
“Grisi ato që ke shkruar. Mëso të tregosh të vërtetën
që zvarriset në baltra, në dhé.
…Lëri zogjtë
dhe yjet
dhe shënjtorët
dhe gjethnajat,
këtë botë e drejtoj unë
me pika helmi e zbukuroj, e stërpik.
…Ulu në lajthishtet e mia
ku gjinkalla gris fytyrën
ku gjethet marrin flakë
e krojet këndojnë…
Mëso të shkruash si unë
këmisha ime fëshfërin në çdo stinë
tek rreshqas në bar e në fletë…
Në vjeshtë, kur digjet bliri kuqërrues,
bije në gjumë, mbështillem me vetveten
e përgatis një pikë helm në gjëmbin e
trendafilit. Bukuroshet t’i puth në buzë…
…Askush s’e ka shkruar dramën time,
të vjetër, që kur nisi botë e mishit.
Kryeëngjëll isha në qiell
Por s’më la mallkimi hipokrit…
Adamit i tregova shalët e bardha të Evës
mjaltin që i gufonte në gjinj…
Grisi të gjitha e shkruaj
për helmin e lotit
për një krijues si unë
që zvarriset në baltë.”
DASHURIA
Dhe më e përbetuara s’është e sigurtë
Trupi di vetëm të sajojë pengesa.
Në dy buzë që puthen
Në dy trupa që lidhen
Kryqëzohen katër udhë të dyshimta
Katër fusha të mbjella me puthje të tjera
Trupi di vetëm të sajojë pengesa.
Dhe kur dehet dhe harliset
pakuptuar
mbërthehet me gozhdë të mishta.
Së sipërmi dërguar
për ta kryqëzuar.
STINË PUTANASH
Viti ka vetëm këtë stinë.
E rrethoi dhe lagjen e tejme
dhe zemrën e qytetit
me kollona kofshësh e kështjella gjinjsh.
Viktimat,
të lumtura
puthin lëkura të mermerta:
zgjatin duart të ngrohen në thëngjijtë e mbetur
e lëpijnë manaferrat e kuqerremta
as shuar, as ndezur.
Buzë që puthin njollat e yjeve
muzikë e trishtuar epshi
që fillon nga duart,
që zbresin në një të çarë muri;
Koka të përmbytura në hone të pafund
që pështyjnë në ekstazë
në një pellg të përbashkët.
Nuk di pse stepem në këtë stinë.
E shikoj pellgun e përbashkët
rrethuar me bar të ndryshkur
ku princa të rinj e të vjetër
pështyjnë gulçima farash e thelpinj të vdekur;
e shkul vështrimin nga pellgjet e stinës
ku shuhen bishta cigaresh
e digjen manaferrat.
Dëshpërimisht e lumtur fërgëllon kjo stinë
me gjeste arkaike.
Gjinkalla e pangopur këndon në kallamishte
e kallamat e rrëzuar
humbasin fytyrat.
BALADA E FAMILJES
Qiell i copëtuar
Ajër i rralluar
Pasqyrë e thyer.
Ikën shpirtërat
Ikën.
Morën hallin e tyre në sqetull
Dhe ikën.
Nga sytë këmbët
të vetmuar.
Nëna luan me copëra xhamash
nëpër kokrra loti
krijon fragmente fytyrash.
të largëta
te dashura.
Dhe …Në gjak …i mbijnë
Gj
ë
mb
a
të helmët…
Tavani i qiellit vrima – vrima
Nëpër re të qelqta
Rrëshqasin yjet
Co-pë-to-hen
Thy-hen..
ATA
Ata kanë tepruar nga pylli prej krome
shkurre
që pshurrin nën vete
të etur për hije pemësh të larta
shkurre
që shushurijnë e psherëtijnë fshehur vesh më vesh
mund të lini një lulëkuqe harrimi
dhe ikni, ikni
mbuloni fytyrat e zverdhura dhe ikni
merrni me vete dhe gjurmët
dhe zhgarravinat e rrufeve të ndryshkura të Zeusit
dhe hijet tuaja hiqni zvarrë,
ose heshtni
siç heshtin gjethet e rëna.
është ndalur shiu në shi
është prerë udha dhe fjala
s’kam për ju asnjë lot qiriri
asnjë fije bari
t’ua hedh mbi qefin.
LULJA E GJAKUT
Lulja e gjakut fle në një kupolë plumbi
e sheh ëndrra të metalta
S’ka farë jete
as gjethe, as syth.
Rrufeshëm shpërthen në mish
e çel petale të kuqe
të lëngshme
të ngrohta
që derdhen pa formë.
Më ngjeth e kuqja.
Si dem harboj në kodra e lugina
me një prush mornicash në shpinë.
Vdekja pikturon vetveten
dhe në lule
dhe në flamurë.
Vdekja i thyen qelqet e kaltra të gjakut
e në miliona fytyra ngrin
si korb prej shkrumbi.
Kam mbetur varur në harkun e ylberit
e nu*****************k ia pres dot
atë degën prej plumbi…
I BRAKTISURI
Fytyrë e rrudhosur, plasaritur
Hedhur tej
si letër e zhubrosur.
Pingponget e syrit
kërcyer në mes të faqes
Dy planete të harruar
Përpelitin qepallat
Në shkreti.
Asnjë trokitje në derë
Asnjë yll në dritare
Asnjë cicërime zogu
Asnjë fije bari.
Të thara lulet
Në saksi.
RIVDEKJA IME
Nëse dhe atje do të jetë ky diell
që i mban pemët të mbërthyera në gozhdë,
Nëse dhe atje nuk do të jem i lirë
t’i thyej fenerët në udhët prej drite
e të kalëroj nëpër jele ylberësh
nëse shirat s’do të jenë të arta
e flokët e vjeshtës të jeshilta,
do të trokas në shtëpinë e Nënë Terezës
do t’i them që m’u mërzit dielli e drita
do kërkoj të rivdes në duart e saj
të ngordh si pemë e burgosur
e të kërkoj foletë e vjetra të zogjve
kur isha gjallë.
E PRES ATË AKT NË SHTYLLË….
( Një poeti )
Poet do të thotë Nënë Tereze
Adam i ri
që thërret të gjitha krijesat nën hënë
ndan copa nga vetvetja për të tjerë
dhe pas vdekjes.
I heshtur sajon kujtesën.
Ti vdiqe disa herë.
Nëpër të gjithë pllakat e mermerit
Së bashku me varrmihësit e tu
gdhende emrin tënd
pa u varrosur.
Me tamtame, banda e dekorata
Sajove harresën. Patëm shumë korba
e asnjë nekrologji. Asnjë.
Nuk është vonë për ta rinisur betejën.
E pres atë akt:
shpalli vdekjet e disa vetveteve
në shtyllen e qytetit.
Unë do të vrapoj i pari
do t’i gris nekrologjitë
do ta kthej karvanin nga varrezat
do të të marr prej krahu
t’i thyejmë mermeret fallse
ta pimë një kafe për vdekjet e kaluara
Vetëm pas vdekjeve të mëdha
Gjethet e pemëve bien erë dafine.
VETVRASJE
Rrëmbeva dhe unë një armë
dhe e vara në gozhdën
e një gjumi të egër.
Tani s’shikoj më ëndrra
m’u trembën dhe sorkadhet
dhe puthjet dhe malli.
Hëna s’vjen tek unë
e zogjtë
e ylberët
e lulet m’u thanë
Vdekja fillon nga gjumi.
Dhe ju, njerëz, që më doni
mos ejani në varrin e një të marri.
VILA E HAJDUTIT
Kaloj pranë vilës së deputetit tim.
në majë të gishtave. Mospërfillës
Si i kamur. Me frikë e neveri.
Sikur shkel mbi pllaka myshqesh të rrëshqitshëm
Nuk trokas
në këtë portë.
Shkallëve të bardha
e dhomave të ndritshme
rriten zambakë të rinj
Jashtë, në harkun e portës së mermertë
varen tre gjarpërinj.
GURË DHE KRIMBA
Shkul gurë të rëndë nga udha
e në çdo gjurmë
zbulohen krimbat
kokëkuq, kokëzinj, kokëverdhë
lëvrijnë
Thonj të prerë
kllouna mikroskopikë
përpëliten
e krimben krimbat
Më të rëndë se gurët
Krimbat.
SALVADOR DALI-së
Diçka e pyetën për trupin e shpirtin
piktorin “e çmendur”
Ai vizatoi një çadër të tendosur
qepur me penj të mishtë
ku dukej skeleti me tela të bardhë
gati në të rrëzuar.
Shpirti vjen pas, tha ustai
e, sikur shkarraviste,
vizatoi një shatërvan bari
që shpërthente nga toka
ngjitej nëpër shpore yjesh
si ylber prilli
me gjethe të përhershme.
S’kuptojmë gjë, i thanë...
Ai buzëqeshi hidhur
e vizatoi një thumb të bukur gjiri
në majën e shpatullës së një femre.
e rrethoi me flokë rrathësh të çoroditur
dhe vuri gishtin mbi çatinë e çmëndinës
ose në ballin e kësaj bote.
ËNDËRR ME TË VRARË
Mbrëmë në dhomën time
me çapa të lehtë
erdhi një kaprolle lakuriq
rrëshqet nën çarçafë
e kërkon të vritet
Kish lulëkuqe zjarri
në trupin si eshkë
nëpër fllade flakësh u dogja
mbi gjinjtë e saj si kulla të bardha
u ngjita
dhe atje më zuri plumbi.
DITA E GJARPËRIT
Pikojnë yjet
e ma vesojnë barin
nëpër bar rrëshqet gjarpëri
e pi pika vese.
Kur rrezja e diellit i bie pingul
ndërron këmishën si dhëndër
e vërshëllen këngë helmi.
M’i pështyti të gjitha
dhe gjethet
dhe fijet e barit
dhe këngën.
Këmisha transparente e ditës
vezullon
fëshfërin
në një gur mëngjesi.
I trishtuar,
helmin laj nëpër vese
dhe
luaj me një gjethe bari në buzë.
MEDITIM PËR NJË ZAMBAK TË VERDHË
I pakapshëm ëngjëlli im
i largët, ajër i kulluar
pa trajtë, pa fytyrë.
Nëpër ëndërra më qaset vetëm një leshverdhë
e zambaktë
hënë e plotë erëmirë.
Sapo çel sytë e zgjas dorën ta prek
kordat e zërit më këputen si flutura
ajo më ikën befasisht.
Një natë qëndrova zgjuar pas derës
erdhi me hapa të lehtë....
Qielli u mbush me zambakë të përhënur
Nuk e dëgjuam as mëngjesin
që kishte thyer dritaren
Të dy përqafuar
ishin mbytur në detin me hënë
BALADA E PËLLUMBIT
Pëllumbi nuk arriti tek ti, shpirti im.
Nuk e lanë të ta dorëzonte fjongon
që i lidha në këmbë;
të të qëndronte në sup e në krahë
me afshin e luleve erëmirë
t’i derdhte ato gu-gu-të e argjenta të gushës
siç dinte ai.
Prita shigjetash i ngritën ostrogotët
e ai, me dy pika loti në sy
u fsheh në një të çarë shkëmbi
Ah, e ah! o shpirti im
Kur u mbyllën tre vjet, tre muaj e tre ditë
ata ia mbyllën hyrjen me një gur si kont Ugolinit.
I përhumbur jetoi ca ditë në terr
me ca thërrime të kaltra ëndërrash;
Kur u zgjua, nga tmerri, çau gushën e tij me thonj
Fjongon e dashurisë e hëngri me sqep
dhe u bë gjërpër;
si gjarpër shkau nëpër plasën e gurit
e pa që bota s’kish më qiell...
mos u tremb, shpirt
është gjarpër shtëpie
zvarriset e zvarriste për të arritur tek ti.
Era ma vari në portë
këmishën e tij të mëndafshtë
e ruaj për ty, shpirti im.
Ka dy pika xhami të ngrira në sy
xixëllonja të shuara
dhe brymën e gu-gu-ve të vrara.
VIJAT
Prapa mureve të rrethinës sonë
kuaj të bindur
tërheqin qerre të lehta
me arkivole bosh.
Rrota të hekurta
Të përbaltura
gërvijnë, kujisin, qajnë
mundohen të lënë vijat pas.
Trishtueshëm
Kokëulur
Çapiten kuajt drejt stacionit të fundit
S’kam gjë me kuajt
As me arkivolet
Por me vijat.
LUTJE JASHTË LUTJEVE
O Zot!
Më lejo të rrëfehem:
Vëllezërit e mi në njëqind shtete
Më kanë derdhur nëpër statuja.
O Zoti im!
Nuk ndjehem mirë!
Mbërthyer në bronz
Më shtrëngojnë sytë e veshtë e duart e brinjët...
Dhe kur më ledhatojnë emrin tim
Nëpër epitafe të florinjtë!
O Zoti Krisht!
Vendin tim e kanë lodhur heronjtë!
Lejomë të jem vetëm një laps në dorën tënde,
Një lule psherëtime,
Një zog prej ere
Një puthje
Një gjethe dafine!
Lejomë, o Zot
të jem një qiri i hollë që digjet e shuhet
Dhe ruamë nga heronjtë!
Amin!
GËRMADHAT
Mure
Mure
Mure
Me ballë e me supe
e nisa rrëzimin
dhe mbeta në gërmadha
Shkarravina diktaturash
kodra kaotike gërmadhat
më të pakalueshme se muret
Unë s’kam kohë
Unë do iki
Liria
plas
në mua
si kryq
PEMA E PLAGOSUR
Papa Gjon Palit II
Pemë e lulëzuar degëshumë
nuk do t’i shijosh frutet e tua
Ti,
prerja e kërcellit të vjetër
Ti, plaga
Rrënja e shartimit
syth elitar
në anën e buzës së prerë
Nga çarja kemi lindur
nga dhimbja
dhe frutet nuk do t’i arrijmë
Brenda teje
lulëzon një pemë e plagosur
në gjak
vezullojnë rubinë prej drite
Mëkatet e globit mban në shpinë
kate-kate
i sistemon në qiell
si varre
Të përkuli,
Të shtrembëron pesha
mal i rëndë qenka njeriu!
Kur ti dridhesh nga dhimbja
nata shtyhet tutje
shpirti flet gjuhë shpirti.
Në degët e tua askush s’ndjehet i huaj
dhe bilbili
dhe korbi
mbetet vetvetja.
Përditë i flet shekullit të pistë
“Hani frutat e arrira mbi mua,
mbi mua,
pemën e plagosur!”
· Urdhëri i Lotit (Parma Shri, ind.) – është dekorata më e lartë që u jep presidenti indian personaliteteve më të shquara.
No comments:
Post a Comment